Simuno at Panaguri sa isang Pangungusap

 

"Ang kape ay pampagana".

Ano ang simuno dito, at ano ang panaguri?

Sa isang pangungusap (o "sentence" sa English) ay mayroon dalawang bahagi: ang SIMUNO at ang PANAGURI.

Ano ang SIMUNO at ano ang PANAGURI?

SIMUNO

• Ang isang tao (o grupo ng mga tao) o ang isang bagay na pinag-uusapan. Ito ay ang paksa ng pangungusap.

Halimbawa, sa isang pangungusap katulad: "si Maria ay maganda" sino ang pinag-uusapan?

Syempre "si Maria".

Sa pangungusap "ang bahay ko ay nasa ibabaw ng isang bundok" ano naman ang pinag-uusapan?

Syempre "ang bahay".

Kaya, sa mga halimbawa na nasa itaas ang tao (si Maria) na pinag-uusapan at ang bagay (ang bahay ko) na pinag-uusapan ay ang paksa o simuno.

PANAGURI

Ano kaya ang "panaguri"?

• Ang "panaguri" ay ang bahagi ng pangungusap na "nagsasabi" tungkol sa "simuno".

Kaya sa dalawang halimbawa na nasa itaas ang mga panaguri ay:

"ay maganda"

At

"ay nasa ibabaw ng bundok".